3 günlük dünya

 

Mənim balam bu dünyayla oynama,

Sən cavansan dünya qoca dünyadı.

Ramiz Rövşən

 

Bilmirəm bunu kim xalqın ağlına salıb. Lakin uzun zamadır ki, bu fəlsəfəni həyatın mərkəzinə qoyanlar “dünya sənin, dünya mənim, dünya heç kimin” ideyası ilə yaşayır. Elə bil həyata “xaltura”ya gəliblər. Açığı maarifçilik ideyaları ilə tanış olanda görmək olur ki, biz yül il öncə də belə idik. Hələ də Sabirin, Mirzə Cəlilin, Axundzadənin tənqid etdiyi insanların yeni versiyaları həyatdadır. Deyəsən Məmməd Araz demiş, “yüz il qoşa atılsaq da qoşa düşmərik”. Çünki “bir taleyin oyununda cütlənmiş zərik”.

Gəlin indi “əyri oturaq, düz danışaq”. Ancaq “düz danışan düzdə qalar”. Düz danışmaq həmişə çətin olub. Təsadüfi deyil ki, çoxlarımız Ezop dilində danışırıq. Düz danışmaq çətin olduğu üçün 3 günlük dünyada heç kim düz danışmaq istəmir. Çünki həmişə insan müxtəlif fikirlərin təsirində qalır. Tarixdə qalmaq yoxsa həyatda qalmağın daha vacib olduğunu düşünmək lazım gəlir. Əlbəttə, çoxlarının həyatda qalmağı üçün kimsə tarixdə qalmalıdı.

Dünyanın 3 günlük olması insan davranışına çox ciddi təsir göstərir. Çoxu istəyir qısa müddətdə varlı olsun. Boş yerə “varlı olmağın 1234 qaydası” kitabı ən çox satılanlar siyahısında olmur. Ç.Darvin həyatda qalmaq uğrunda mübarizə ideyasından çıxış etsə də, görünən odur ki, Darvin tarixdə qalıb, biz isə həyatda qalmaq istəyirik.

3 günlük dünyanın 2-ci günündəsinizsə, tarixdə qalmaq üçün də, həyatda qalmaq üçün də 1 gün qalır. “Hər kəs həyatdan bir şey əldə etməyə çalışır. Amma heç kim həyata nəsə qatmağı düşünmür”. "Bəyaz zanbaqlar ölkəsi" Q.Petrov