Hazırki dövrün insanlarını başı dolu, cibi boş və cibi dolu, başı boş olmaqla iki yerə ayıra bilərik. Təhsilin, səhiyyənin, qanunun və buna bənzər sadalamaq mümkün olan məfhumların "üstü bəzək, altı təzək" olduğunu nəzərə alsaq, bu normaldır. Uzun zaman öncə Nizami kimi dahinin kamil palançını, yarımçıq papaqçıdan üstün tutduğunu bildiyimiz halda ,demək olar ki, hər şeyimiz yarımçıqdı. Deyəsən, uşaqlıqdan oxuduğumuz, düzgün hesab etdiyimiz əməllər ancaq tamadanın dilində toy məclisləri üçündür.
Cəmiyyətin niyə tiktokdan pul qazanmağı haqqında yazılan tənqidlərin heç bir mənası yoxdur. Çünki qəpiyə güllə atan xalqımız, canlı yayımda şir atmaqdan zövq alır. Adətən həm başı, həm cibi boş olan cəmiyyətin nümayəndələri, başqa sözlə desək "homo tiktokus"lar belə yarımçıq təhsilin məhsuludur. Bu yerdə qeyd edim ki, "homo sapiens"ləri idarə etmək "homo tiktokus"dan çətindir.
Nəzərə alsaq ki, indi ucuz ölümün olduğu cəmiyyətlərdə ,adətən, yaşamaq baha olur. Bəzi mütəffəkirlərin fikrinə görə isə indi yaşamaq sərf eləmir. İndi insanların yaşamağın nə olduğu sualına cavab tapmağa vaxtı yoxdur. Monotonlaşmış həyat beton binadan çıxıb digər beton binaya və geriyə hərəkətdən ibarətdir. Bu trayektoriyaya isə işə getmək adı verilib.
Oğurluğun artığı dövrümüzdə hər hansısa əmlakı oğurlamaq, gələcək oğurlamaq qədər təhlükəli deyil. Çünki əmlakın dəyərini pulla ödəmək olur, gələcəyi ödəmək üçün isə illər lazımdır.
Rəvan Əziz
Yorumlar
Yorum Gönder